Əmək və əhalinin sosial müdafiəsi naziri Səlim Müslümovun keçirdiyi görüşdə Siyəzən, Şabran, Quba, Qusar, Xaçmaz rayonlarının sakinləri iştirak ediblər.

Vətəndaşlar məşğulluğun təmin edilməsi, kiçik ailə təsərrüfatının yaradılması üçün özünüməşğulluq proqramı çərçivəsində aktivlərlə təmin edilmə, peşə hazırlığı kurslarına cəlb olunma, tibbi-sosial reabilitasiya, imtiyazlı şəxslərin mənzillə təminatı, əmək hüquqlarının müdafiəsi, sosial xidmətlərin göstərilməsi, bu və ya digər sosial təminat növünə hüququn müəyyən edilməsi və s. məsələlərlə bağlı müraciət ediblər.

Müraciətlər nazirliyin müvafiq struktur bölmələrinin məsul şəxslərinin iştirakı ilə cavablandırılıb, müraciətlərdə əksini tapan məsələlərin həlli ilə əlaqədar tədbirlər görülüb. Ayrı-ayrı şəxslərin müraciətlərinə əsasən reabilitasiya vasitələri və sosial xidmətlərlə təmin edilmələri barədə tapşırıqlar verilib.

Nazirliyin məşğulluq orqanları tərəfindən Siyəzən, Şabran, Quba, Qusar, Xaçmaz rayonlarında aktiv məşğulluq tədbirlərinin davam etdirildiyini bildirən S.Müslümov bu tədbirlərin davamı kimi, ötən il bu rayonlarda məşğulluq orqanlarının xətti ilə əlavə olaraq 2154 nəfər işsiz və işaxtaran şəxsin münasib iş yerləri ilə təmin olunduğunu, 85 nəfər üçün peşə hazırlığı kurslarının təşkil edildiyini qeyd edib. Həmçinin,Qarabağ müharibəsi əlilləri və şəhid ailələrinin mənzillə təminatı proqramı çərçivəsində son iki ildə Siyəzən, Şabran, Quba, Qusar, Xaçmaz rayonlarında, ümumilikdə 30 ədəd fərdi yaşayış evinin bu təbəqələrdən olan insanların istifadəsinə verildiyini diqqətə çatdırıb.

Zərifə BƏŞİRQIZI,
“Xalq qəzeti”