Azərbaycanın İtaliyada və eyni zamanda, San-Marinodakı səfiri Vaqif Sadıqov etimadnaməsini San-Marinonun regent kapitanları Covanni Françesko Uqolini və Andreya Zafferaniyə təqdim etmişdir.
Səfirlikdən bildirmişlər ki, mərasimdə V.Sadıqov Azərbaycan Prezidenti İlham Əliyevin səmimi salamlarını regent kapitanlarına çatdırmışdır. Diplomat Azərbaycan ilə San-Marino arasında bütün sahələr üzrə əməkdaşlığın genişləndirilməsi istiqamətində fəaliyyət göstərəcəyini bildirmişdir.
Regent kapitanları Azərbaycan xalqına dərin ehtiramlarını ifadə etmiş, əmin-amanlıq və firavanlıq arzulamışlar.
Mərasimdə San-Marinonun xarici işlər naziri xanım Antonella Mularoni, bu ölkənin İtaliyadakı səfiri Daniela Rotondaro, Parlamentin xarici əlaqələr komitəsinin sədri, XİN-in Siyasi Əlaqələr İdarəsinin rəisi, səfir xanım Federika Bici və Azərbaycanın İtaliyadakı səfirliyinin əməkdaşları Erkin Heydərli, İlqar Fərəcov iştirak etmişlər.

AzərTAc