Azərbaycan Respublikası Dövlət Gömrük Komitəsinin sədri Aydın Əliyevin Argentina Respublikası Federal Gəlirlər üzrə Dövlət Administrasiyasının rəhbəri Rikardo Eçeqarayın dəvəti ilə bu ölkəyə səfəri başlanmışdır.
Xarici İşlər Nazirliyindən verilən məlumata görə, səfərin ilk günündə iki ölkənin gömrük orqanlarının rəhbərləri arasında fikir mübadiləsi aparılmış, Azərbaycan Respublikası Dövlət Gömrük Komitəsinin keçdiyi tarixi yol və hazırkı fəaliyyətinə dair film nümayiş etdirilmişdir.
Görüşdən sonra A.Əliyev Argentina gömrük xidmətinin rəhbər heyətinin müşayiəti ilə Buenos-Ayres portunun gömrük terminalına gəlmiş və terminalın fəaliyyəti ilə tanış olmuşdur.
Səfər çərçivəsində iki ölkə arasında gömrük sahəsində əməkdaşlıq haqqında sazişin imzalanması, "Azərbaycan gömrüyü bəşəri dəyərlər prizmasından" adlı sərginin və Dövlət Gömrük Komitəsi tərəfindən nəşr edilmiş kitabların təqdimatının keçirilməsi nəzərdə tutulur.
Eyni zamanda, Argentinanın hökumət, ictimai və işgüzar dairələrində görüşlərin keçirilməsi planlaşdırılır.