Küveytin ən böyük məscidi olan "Əl-Məscid Əl-Kəbir" kompleksində müsəlman ölkələrinin beynəlxalq sərgisinin açılış mərasimi keçirilmişdir.
Azərbaycanın Küveytdəki səfirliyindən bildirmişlər ki, ölkəmiz sərgidə iki mövzu-ekspozisiya ilə təmsil olunmuşdur.
Ekspozisiyanın biri Xocalı soyqırımının 19-cu ildönümünə həsr edilmişdir. Burada qoyulmuş stendlərdə "Xocalı uşaqların gözü ilə" rəsmləri nümayiş etdirilir.
Ekspozisiya çərçivəsində səfirliyin təşəbbüsü ilə ərəb dilində yeni nəşr olunmuş "Xocalı soyqırımı" kitabının və Xocalı faciəsini əyani şəkildə Küveyt ictimaiyyətinə çatdıran filmin ərəb dilində CD variantının təqdimatı da keçirilmişdir.
Təqdimat mərasimində keçmiş sovet ordusunun yardımı ilə Ermənistan silahlı birləşmələrinin Xocalı şəhərində törətdikləri vəhşiliklər və faciənin əsl mahiyyəti barədə sərgi iştirakçılarına ətraflı məlumat verilmişdir. Tədbirdə Azərbaycan xalqının ümummilli lideri Heydər Əliyevin səyi nəticəsində Xocalı həqiqətlərinin üzə çıxarılması, bütün dünya ictimaiyyəti qarşısında ermənilərin təcavüzkar siyasətinin ifşa olunması xüsusi qeyd edilmişdir.
Küveytin vəqflər və islam işləri nazirinin müavini, ölkənin tanınmış siyasi-ictimai xadimi doktor Adil Abdullah Əl-Fələh sərgidəki Azərbaycan guşəsini ziyarət edərək, burada nümayiş etdirilən rəsmlər və nəşrlərlə yaxından tanış olmuşdur.
Sərgidə Azərbaycanın füsunkar təbiəti, qədim tarixi, zəngin mədəniyyəti, sürətlə inkişaf edən iqtisadiyyatı, böyük turizm potensialından ətraflı bəhs edən fotolar, videofilm, mətbuatda dərc olunmuş məlumatlar, sənətkarlarımızın əl işləri də nümayiş etdirilir.
Azərbaycan ekspozisiyasına gün ərzində 200-dən çox tamaşaçı baxmışdır. Ekspozisiya Küveyt ictimaiyyətinin, KİV-lərin təmsilçilərinin, eyni zamanda Əl-Küveytdə akkreditə olunmuş səfirliklərin nümayəndələrinin və müxtəlif ölkələrdən gəlmiş qonaqların diqqət mərkəzində olmuşdur.
Sərgi üç gün davam edəcəkdir.{nl}

AzərTAc