Fevralın 21-də dünyanın nüfuzlu jurnalist təşkilatı olan Beynəlxalq Mətbuat İnstitutunun (BMİ) direktoru Alison Betel Makkenzi və qurumun mətbuat, kommunikasiya məsələləri üzrə meneceri Antoni Milz Bakıya işgüzar səfərə gəlmişlər.
BMİ-nin Azərbaycan Milli Komitəsinin rəhbəri Umud Rəhimoğlu bildirmişdir ki, səfərdə əsas məqsəd Azərbaycan mətbuatının real vəziyyəti ilə yaxından tanış olmaq, onun inkişaf etdirilməsi yolları barədə müzakirələr aparmaqdır.
Səfər çərçivəsində qonaqlar fevralın 22-dən etibarən Azərbaycanın dövlət rəsmiləri, bir sıra media qurumlarının rəhbərləri, o cümlədən vətəndaş cəmiyyəti nümayəndələri ilə görüşəcəklər.
Xatırladaq ki, BMİ 1950-ci ildə yaradılmışdır. Mərkəzi ofisi Vyanada yerləşən qurumun dünyanın 120 ölkəsində üzvləri var. Təşkilatın hər il keçirilən Dünya Konqresinə və Baş Assambleyasına dünyanın 500-ə yaxın tanınmış media nümayəndəsi, dövlət və hökumət başçıları, təmsilçiləri qatılırlar.

AzərTAc