Prezident İlham Əliyevin korrupsiyaya qarşı qəti mübarizənin aparılması ilə bağlı tapşırıqların hər bir hakimə çatdırılması məqsədilə Məhkəmə-Hüquq Şurası (MHŞ) regional müşavirələr keçirmiş, mövcud problemlər, korrupsiyaya şərait yaradan hallar bütün hakimlərin iştirakı ilə təhlil olunmuşdur.
MHŞ-dan bildirmişlər ki, şurada yeni yaradılmış Korrupsiyaya qarşı mübarizə Sektoru tərəfindən vətəndaşların şikayətləri əsasında Bakı şəhərinin Yasamal, Binəqədi, Xəzər, Nizami rayon, Mingəçevir şəhər və Gədəbəy rayon məhkəmələrində keçirilmiş yoxlamalar nəticəsində korrupsiyaya şərait yaradan hüquqpozmalara yol verildiyi müəyyən edilmişdir.
Belə ki, bəzi hakimlər kobud süründürməçilik etmiş, məhkəmə proseslərində tərəflərin iştirakının təmin edilməsi üçün bütün lazımi tədbirləri görməyərək, cavabdehin prosesdən kənarda qalmasına, apelyasiya hüququnun əsassız məhdudlaşdırılmasına və digər pozuntulara yol vermişlər.
Bununla əlaqədar şura tərəfindən 6 hakim barədə intizam icraatları başlanılmışdır.
Hazırda korrupsiyaya şərait yaradan halların aşkar edilməsi və aradan qaldırılması üzrə tədbirlər davam etdirilir. Bu məqsədlə məhkəmələrdə mütəmadi monitorinqlər keçirilir, vətəndaşların müraciətlərinin hərtərəfli, o cümlədən yerində yoxlanılması təmin olunur.