Dövlət Sərhəd Xidməti (DSX) narkotik maddələrin qaçaqmalçılığına qarşı mübarizədə çox böyük uğurlar əldə etmişdir.
Bunu jurnalistlərə DSX-nın rəisi, Sərhəd Qoşunlarının Komandanı, general-leytenant Elçin Quliyev bildirmişdir.
E.Quliyev demişdir ki, Azərbaycan dövləti narkotik maddələrin və onların prekursorlarının qanunsuz dövriyyəsinə qarşı mübarizə sahəsində mühüm tədbirlər görür. DSX-nın quru və su sərhədlərindəki nəzarət buraxılış məntəqələri yüksək standartlara cavab verən texniki avadanlıqla təmin olunaraq xüsusi iş rejiminə keçmişlər. Xidmətin şəxsi heyətinin peşəkarlığının artırılması, yüksək ixtisaslı kadr hazırlığı da daim diqqət mərkəzindədir. Bunun nəticəsidir ki, narkotiklərin qanunsuz dövriyyəsinin, daşınmasının, dövlət sərhədlərinin pozulmasının qarşısının alınmasında xeyli uğurlar qazanılmışdır.
E.Quliyev qeyd etmişdir ki, narkotik maddələrin qanunsuz dövriyyəsinin qarşısının alınması üçün DSX hüquq-mühafizə orqanları ilə sıx əməkdaşlıq edir.