Ermənistan tərəfindən işğal olunmuş Azərbaycanın Dağlıq Qarabağ bölgəsinə arzuolunmaz səfərlərdən çəkinmək barədə Polşa, Fransa, Almaniya, Böyük Britaniya, İtaliya və İspaniyanın Xarici İşlər nazirlikləri öz ölkələrinin vətəndaşlarına xəbərdarlıq etmişlər.
Növbəti bu cür xəbərdarlıq Macarıstanın Xarici İşlər Nazirliyinin (XİN) rəsmi saytında da yerləşdirilmişdir. Bu ölkənin xarici siyasət idarəsi vətəndaşlarına Azərbaycanın müvafiq rəsmi qurumlarına qabaqcadan məlumat vermədən işğal altında olan Azərbaycanın Dağlıq Qarabağ bölgəsinə və onun ətrafındakı ərazilərə səfər etməyi məsləhət görmür.
Macarıstanın XİN, eyni zamanda, öz vətəndaşlarını Azərbaycan-Ermənistan silahlı qüvvələrinin təmas xəttinə yaxın ərazilərə getməkdən çəkindirir.
Qeyd edək ki, Macarıstan tərəfi indiyədək Dağlıq Qarabağı Azərbaycanın ayrılmaz tərkib hissəsi saydığını və Ermənistan-Azərbaycan, Dağlıq Qarabağ münaqişəsinin sülh yolu ilə, Azərbaycanın suverenliyi və ərazi bütövlüyü çərçivəsində həllinin tərəfdarı olduğunu bəyan etmişdir.{nl}

Pərvanə QARAYEVA, AzərTAc-ın xüsusi müxbiri
Budapeşt