Qazaxda 145 çarpayılıq Mərkəzi Xəstəxana binası inşa olunur və burada son tamamlama işləri aparılır. Rayon İcra Hakimiyyətinin başçısı Rəcəb Babaşov işin gedişi ilə tanış olmaq üçün tikinti meydançasında olub.

Baş iş icraçısı Calal Əfəndiyev rayon rəhbərinə məlumat verib ki, hazırda tikinti işləri ilə 10 briqada məşğul olur. Binanın örtük hissəsində tamamlama işləri artıq qurtarmaq üzrədir. Fasad hissəsində aparılan suvaq işləri də yekunlaşır. Binanın daxilində işlər demək olar ki, başa çatdırılıb. Hazırda elektrik və havalandırma işləri həyata keçirilir, sanitar qovşaqlarına metlax və kafel döşənir, pilləkənlərə üzlük vurulur.    

Qeyd olunub ki, tikintidə bütün işlər paralel aparılır. Binanın daxili ilə yanaşı çöl hissəsində də abadlıq- tikinti işləri görülür. Binanın ətrafına hasar çəkilib, Giriş hissəsinə  aqlay vurulub, işıqlandırma sistemi qaydaya salınıb, qazanxana binası inşa olunur, iki ədəd su hovuzu tikilir.

Rəcəb Babaşov burada hər hansı bir problemin olub-olmaması ilə maraqlanıb və konkret tapşırıqlarını verib, öz tövsiyələrini bildirib.

Hamlet QASIMOV,
“Xalq qəzeti”nin bölgə müxbiri