Aprelin 26-da Bakıda, "Gülüstan" sarayında keçirilən dünya dini liderlərinin sammiti çərçivəsində YUNESKO yanında Din Xadimlərinin Məşvərət Qrupunun ilk iclası olmuşdur.
İclasda Qafqaz Müsəlmanları İdarəsinin sədri, şeyxülislam Allahşükür Paşazadə, Moskva və Bütün Rusiyanın patriarxı Kirill, bütün ermənilərin katolikosu II Qaregin, digər ölkələrin din xadimləri, eləcə də YUNESKO-nun regional nümayəndəsi Dendev Badarc iştirak etmişlər.
Moskva və Bütün Rusiyanın patriarxı Kirill bildirmişdir ki, dini icmaların beynəlxalq təşkilatların fəaliyyətində rolu gündəmdə olan məsələlərdəndir. Patriarx Kirill dini icmaların beynəlxalq təskilatlarla daimi iş üçün xüsusi qrupun fəaliyyətinin vacibliyini vurğulamışdır.
Qeyd olunmuşdur ki, YUNESKO-nun keçmiş baş direktoru Koişiro Matsuura da bu qurum yanında Din Xadimlərinin Məşvərət Qrupunun yaradılması istiqamətində mühüm səylər göstərmişdir. Qurumun yeni rəhbəri İrina Bokovanın təşəbbüsü ilə isə YUNESKO-da sülh və mədəniyyətlərin dialoqu paneli yaradılmışdır. Bu təsisat din xadimlərindən ibarət qrupun YUNESKO ilə əməkdaşlığı üçün gözəl imkan ola bilər.
İclasda YUNESKO yanında Din Xadimlərinin Məşvərət Qrupunun fəaliyyəti və nizamnaməsi ilə bağlı təkliflər irəli sürülmüşdür. Bu təkliflər YUNESKO-nun nümayəndəsinə təqdim olunmuşdur.
Təkliflərə tez bir vaxtda YUNESKO-da baxılacaq və onlara cavab veriləcəkdir.
AzərTAc{nl}