Avropa İqtisadiyyat, Sənaye və Ticarət Palatasının (EEIG) Direktorlar Şurasının qərarı ilə "Azərbaycan Hava Yolları" Qapalı Səhmdar Cəmiyyəti (QSC) ən yüksək - "EuSS Qızıl" dərəcəli Avropa Xidmət Standartına layiq görülmüşdür.
Standartın fəxri diplomu EEIG-nin Azərbaycandakı nümayəndəliyinin rəhbəri Nizami Piriyev tərəfindən QSC-nin vitse-prezidenti Eldar Hacıyevə təqdim edilmişdir. EEIG-nin Avropa Xidmət Standartı yüksək səviyyədə xidmətə nail olmağa və müştərilərin məmnunluğunu saxlamağa çalışan aparıcı şirkətlər üçün təsis edilmiş seçilmə nişanıdır.
EEIG-nin Azərbaycandakı nümayəndəliyindən verilən məlumata görə, "Azərbaycan Hava Yolları" QSC ölkəmizdə bu standartla təltif olunan yeganə şirkətdir. Şirkət Avropa Xidmət Standartı nişanını möhür kimi üz sənədlərində istifadə etmək hüququna malikdir.

AzərTAc