Dövlət Gömrük Komitəsinin (DGK) sədri, gömrük xidməti general-leytenantı Aydın Əliyev Niderland Krallığının Azərbaycandakı səfiri Arjen Peter Uijterlinde ilə görüşmüşdür.
DGK-nın mətbuat xidmətindən bildirmişlər ki, Aydın Əliyev Azərbaycan ilə Niderland Krallığı arasında mövcud iqtisadi, siyasi, mədəni əlaqələrdən söhbət açmış, bu əlaqələrin bundan sonra daha da genişlənəcəyinə əminliyini ifadə etmişdir. O, iki ölkə arasında əlaqələrin müxtəlif istiqamətlərdə, o cümlədən gömrük işi sahəsində genişləndirilməsi üçün böyük potensialın olduğunu və bu imkandan maksimum yararlanmağın vacibliyini vurğulamışdır.
Səfir Arjen Peter Uijterlinde ölkəsinin Azərbaycan ilə bütün sahələrdə əməkdaşlığa çox böyük əhəmiyyət verdiyini diqqətə çatdırmışdır. İki ölkənin gömrük orqanlarının gələcək əməkdaşlığından danışan diplomat gömrük orqanları arasında təcrübə və bilik mübadiləsinin aparılmasının qarşılıqlı əməkdaşlığın inkişafına bir töhfə olacağına əminliyini ifadə etmişdir.
Görüşdə qarşılıqlı maraq doğuran bir sıra məsələlər ətrafında geniş fikir mübadiləsi aparılmışdır.