Azərbaycanda səfərdə olan Gürcüstan Universitetinin Himayədarlar Şurasının sədri, Qafqaz Dostluq Evinin rəhbəri xanım Giuli Alasaniya fevralın 4-də Milli Məclis sədrinin müavini Bahar Muradova ilə görüşmüşdür.
Görüşdə bildirilmişdir ki, Azərbaycan ilə Gürcüstan arasındakı dostluq əlaqələrinin qədim tarixi vardır. Ölkələrimiz dost, qardaş və strateji tərəfdaşlığa malikdirlər. Xalqlarımız, dövlətlərimizin başçıları və onların xanımları arasındakı münasibətlərin yüksək səviyyədə olması bizə strateji hədəflərimizə çatmağımız üçün geniş imkanlar yaradır. Parlamentarilərimiz də əlaqələrimizin genişlənməsinə özünəməxsus töhfələr verir.
Görüş üçün təşəkkürünü bildirən qonaq Gürcüstan və Azərbaycanın daim yaxın dost ölkələr olduğunu diqqətə çatdırmışdır. O, ölkəsinin hər zaman Azərbaycanın dəstəyini hiss etdiyini xüsusi qeyd etmiş və buna görə minnətdarlıq etmişdir.
Sonra görüşdə ölkələrimiz arasında elm, təhsil, mədəni əlaqələrin inkişaf perspektivləri ətrafında fikir mübadiləsi aparılmışdır.

AzərTAc