Təhsil Nazirliyindən bildirmişlər ki, nazir Misir Mərdanov Gürcüstan Respublikasının Prezidenti Mixeil Saakaşvilinin anası, Beynəlxalq Qara Dəniz Universitetinin prorektoru, professor Giuli Alasaniyanın rəhbərlik etdiyi nümayəndə heyəti ilə görüşmüşdür.
Görüşdə M.Mərdanov Azərbaycan ilə Gürcüstan arasındakı əlaqələrin, o cümlədən təhsil sahəsində əməkdaşlığın əhəmiyyətindən danışmışdır.
Beynəlxalq Qara dəniz Universitetinin prorektoru Giuli Alasaniya ölkələrimizin təhsil əlaqələrinin daha da genişlənəcəyinə əminliyini vurğulamışdır.
Azərbaycanın ali təhsil müəssisələrində keçirdikləri görüşlərin əhəmiyyətini qeyd edən qonaq bildirmişdir ki, bu görüşlərdə iki ölkə arasında təhsil sahəsində əməkdaşlığın inkişafı yollarının müzakirəsi aparılmışdır.
Azərbaycan dövlətinin, Heydər Əliyev Fondunun Gürcüstanda tədris ocaqlarının təmirində, dərslik və əlavə vəsaitlərlə təminatında yaxından iştirak etdiyini xatırladan M.Mərdanov Tbilisidə fəaliyyət göstərən M.F.Axundzadə adına Azərbaycan Mədəniyyəti Muzeyinə lazım olan kitabların da göndərilməsi üçün müvafiq tədbirlərin görüləcəyini diqqətə çatdırmışdır. Nazir ölkəmizin ayrı-ayrı ali və orta təhsil müəssisələri ilə tanışlığın qonaqlarda Azərbaycanın təhsil sistemi haqqında xoş təəssürat yaradacağına inamını ifadə etmişdir.
Sonra təhsillə bağlı müzakirələr aparılmışdır.

AzərTAc