Fevralın 2-də Bakıda Azərbaycan-Yunanıstan hökumətlərarası komissiyasının növbəti iclası keçiriləcəkdir.
Yunanıstanın Azərbaycandakı səfirliyindən bildirmişlər ki, iclasda ölkələrimiz arasında iqtisadi əməkdaşlığın genişləndirilməsi, o cümlədən İTGİ (Türkiyə-Yunanıstan-İtaliya) qaz kəməri layihəsi ilə bağlı müzakirələr aparılacaqdır. Bundan əlavə, İTGİ layihəsinin həyata keçirilməsinə imkan verəcək "Şahdəniz-2" yatağı qazının paylanması məsələsi ətrafında da fikir mübadiləsi aparılacaqdır.
İclasda iştirak etmək üçün Yunanıstanın xarici işlər nazirinin müavini, komissiyanın həmsədri Spiros Kuvelisin rəhbərlik etdiyi nümayəndə heyəti Bakıya gələcəkdir.
Fevralın 3-dək davam edəcək səfər çərçivəsində nümayəndə heyətinin Azərbaycanın rəsmi şəxsləri ilə görüşləri nəzərdə tutulmuşdur.
Yunanıstanın Xarici İşlər Nazirliyinin saytında yerləşdirilmiş məlumatda qeyd olunur ki, rəsmi Afina Azərbaycanın inşaat, səhiyyə, infrastruktur, dəniz donanması və rabitə sahələrinə maraq göstərir.