{nl}

Azərbaycanda siyasi məhbus yoxdur. Konkret əmələ görə cinayət məsuliyyətinə cəlb olunmuş şəxslər vardır. Avropanın və Asiyanın heç bir ölkəsinin hüquqi sənədlərində və Cinayət Məcəlləsində siyasi məhbus anlayışı yoxdur. Əgər olsaydı, Avropa Şurası hansısa bir sənədinə və ya konvensiyasına siyasi məhbus müddəasını əlavə edərdi.
Bu sözləri Milli Məclis sədrinin birinci müavini Ziyafət Əsgərov parlamentin fevralın 1-də keçirilmiş ilk iclasında demişdir.
O bildirmişdir ki, buna baxmayaraq hələ də bəzi qüvvələr bu mövzu ilə Azərbaycanı ittiham etməkdə davam edirlər. Azərbaycanda aparılan araşdırmalar zamanı məlum olmuşdur ki, bizdə siyasi məhbusların olmadığını beynəlxalq təşkilatlar öz sənədlərinə qəsdən salmırlar. Onlar bu vasitə ilə ölkəmizin daxili işlərinə qarışmaq istəyirlər.
Milli Məclis sədrinin birinci müavini Avropa Şurasında Yaxın Şərqdə xristianların öldürülməsinə dair müzakirələri də tənqid etmişdir. O demişdir ki, Azərbaycanda bir milyon müsəlman ev-eşiyindən didərgin düşmüşdür. Avropa isə bu məsələni qaldırmır. Dünyanın hər yerində insanlar eyni hüquqa malikdirlər, bunu da hamı bilməlidir.

AzərTAc