Moskvanın və Bütün Rusiyanın patriarxı Kirill aprelin 24-də Azərbaycana rəsmi səfərə gəlmişdir. Heydər Əliyev adına Beynəlxalq Hava Limanında hörmətli qonağı Baş nazirin müavini Elçin Əfəndiyev, Dini Qurumlarla İş üzrə Dövlət Komitəsinin sədri Hidayət Orucov, Qafqaz Müsəlmanları İdarəsinin sədri Şeyxülislam Allahşükür Paşazadə qarşılamışlar.
Hava limanında mətbuat nümayəndələri ilə qısa görüş keçirən patriarx bildirmişdir ki, səfər çərçivəsində o, aprelin 25-də MDB Dinlərarası Şurasının iclasında və dünya dini liderlərinin aprelin 26-27-də keçiriləcək Bakı sammitində iştirak edəcək, habelə, Bakı və Xəzəryanı bölgə Yeparxiyasına baş çəkəcək, Qafqaz Müsəlmanları İdarəsinin sədri Şeyxülislam Allahşükür Paşazadə ilə görüşəcəkdir.
Bu gün cəmiyyətimizdə dinin artmaqda olan rolunu diqqətə çatdıran Moskvanın və Bütün Rusiyanın patriarxı Kirill Bakıda iştirak edəcəyi tədbirlərdə bu məsələnin geniş müzakirə olunacağını söyləmişdir.
AzərTAc{nl}