Dallas şəhərində Azərbaycanın ABŞ-dakı səfiri Yaşar Əliyev ilk telekommunikasiya peyki "Azərsat"ın istehsalçısı "Orbital Sciences Corporation" şirkətinin rəhbəri Deyvid Tomson ilə görüşmüşdür.
Səfir Azərbaycan Prezidenti İlham Əliyevin ölkəmizdə kosmik sənayenin inkişaf etdirilməsinə və informasiya təhlükəsizliyinin təmin edilməsinə xüsusi əhəmiyyət verdiyini qeyd etmiş, həmçinin ölkədə peyk texnologiyalarının istehsalı və tətbiqi üçün geniş imkanların yaradılmasından danışmışdır.
Görüşdə, həmçinin "Azərsat" peykinin istehsalı ilə əlaqədar işlərin gedişi ilə bağlı fikir mübadiləsi aparılmışdır.
D.Tomson bildirmişdir ki, bu gün 50-yə yaxın ölkənin öz süni peyki vardır. Əlbəttə ki, bu yüksək inkişaf etmiş ölkələrə aiddir. Fərəhləndirici haldır ki, Azərbaycan da bu kosmik ailəyə daxil olmuşdur. "Azərsat" peykinin orbitə çıxarılması ilə Azərbaycanın iqtisadi inkişafı daha sürətlə artacaqdır.

AzərTAc