AzərTAc bu məsələyə qəti etirazını bildirir və Google.com-dan səhvin dərhal düzəldilməsini tələb edir
Google.com saytında yerləşdirilmiş dünya xəritəsində Azərbaycanın Ermənistan tərəfindən işğal olunmuş Dağlıq Qarabağ bölgəsində bəzi yaşayış məntəqələrinin adları həm də erməni dilində göstərilmişdir.
AzərTAc xəbər verir ki, xəritədə ölkələrin, şəhərlərin, obyektlərin adları latın hərfləri ilə göstərilmişdir. Amma başqa əlifbalardan istifadə edən dövlətlərə aid olan məlumatlar latın qrafikası ilə yanaşı, həm də milli əlifba ilə qeyd edilmişdir.
Təəssüf ki, Azərbaycanın hazırda Ermənistanın işğalı altında olan Dağlıq Qarabağ bölgəsindəki bəzi şəhər, qəsəbə və kəndlərin adları latın hərfləri ilə yanaşı, həm də erməni əlifbası ilə göstərilmişdir. Bu, ərazi bütövlüyü beynəlxalq səviyyədə tanınmış Azərbaycan Respublikasına münasibətdə yolverilməz haldır.
AzərTAc Google.com-a qəti etirazını bildirir və səhvin dərhal düzəldilməsini tələb edir.

AzərTAc