Yanvarın 19-da Litvanın Azərbaycandakı səfiri Kestutis Kudzmanas və onu müşayiət edən ProReNata Araşdırma İnstitutunun (Litva) direktoru Maldeikis Evgeniyus və Praqmata Beynəlxalq Münasibətlərin İnkişafı İnstitutunun (San Marino Respublikası) direktoru Piero Skarpellini Azərbaycan Respublikasının Prezidenti yanında Strateji Araşdırmalar Mərkəzində (SAM) olmuşlar.
SAM-dan bildirmişlər ki, mərkəzin direktoru Elxan Nuriyev qonaqlara SAM-ın fəaliyyəti - nəşr edilmiş elmi dərgilər, yerli və beynəlxalq əhəmiyyətli tədbirlər və perspektivli layihələr haqqında məlumat vermişdir.
Ölkələrimiz arasında bir sıra sahələrdə daha sıx əməkdaşlıq üçün geniş potensialın mövcud olduğunu vurğulayan tərəflər, həmçinin humanitar sahədə əməkdaşlığın inkişaf etdirilməsinin, elm, təhsil, xüsusilə "beyin mərkəzləri" arasında elmi-tədqiqat sahəsində müxtəlif layihələrin və tədbirlərin həyata keçirilməsinin iki ölkə arasında təmasların intensivləşməsinə zəmin yaradacağına əmin olduqlarını bildirmişlər.
Daha sonra qonaqlar SAM-ın elmi işçiləri ilə görüşmüş, onlarla regional və beynəlxalq məsələlər, bir sıra qarşılıqlı maraq kəsb edən mövzular ətrafında geniş fikir mübadiləsi aparmışlar.

AzərTAc