{nl}

Yanvarın 24-dən 28-dək Strasburqda Avropa Şurası Parlament Assambleyasının qış sessiyası keçiriləcəkdir. Sessiyanın gündəliyinə Moldovada keçirilmiş parlament seçkiləri, "Şərq tərəfdaşlığı" proqramı və onun Şərqi Avropada iqtisadi inkişafa təsiri, Gürcüstanda demokratik təsisatların inkişafı, Bern Konvensiyasının yerinə yetirilməsi və digər məsələlər daxildir. Sessiyada insan haqları və qaçqınların vəziyyəti diqqət mərkəzində olacaqdır.
Azərbaycan parlament nümayəndə heyəti Dağlıq Qarabağ münaqişəsinin həlli məsələsini yenidən gündəliyə gətirəcək, ölkəmizin qəti mövqeyini açıqlayacaq, azərbaycanlı qaçqın və məcburi köçkünlərin pozulmuş hüquqlarının bərpası məsələsini qaldıracaqdır.
İclasda əsas müzakirə mövzularından biri də müasir tələblərə cavab vermək, prosesləri düzgün qiymətləndirmək baxımından Avropa Şurasında islahatlar aparılması məsələsi olacaqdır (bu məsələni Azərbaycan nümayəndə heyəti də qaldırmışdır). Avropa Şurasında islahatlarla bağlı təşkilatda xüsusi komitə də yaradılmış və sessiyada onun "Avropa Şurasının islahatları" adlı məruzəsi təqdim ediləcəkdir.
Sessiyanın keçirildiyi günlərdə Strasburqda Azərbaycanın Avropa Şurasına daxil olmasının 10-cu ildönümü ilə bağlı yubiley tədbirləri də keçiriləcəkdir. Tədbirlərdə AŞPA-nın sədri Mövlud Çavuşoğlu, Strasburq özünüidarə orqanlarının nümayəndələri, tanınmış ziyalılar iştirak edəcəklər.
Sessiyadan sonra AŞPA Monitorinq komitəsinin həmməruzəçiləri Azərbaycana gələcəklər.