{nl}

Birləşmiş Ştatlarda fəaliyyət göstərən icma təşkilatlarının başçıları ABŞ paytaxtına birgünlük müzakirələrə toplaşmışlar. Azərbaycanın ABŞ-dakı səfirliyinin təşəbbüsü ilə keçirilən müzakirələrdə diaspor fəalları 2010-cu ilin nəticələrini təhlil edərək gələcək birgə fəaliyyət planına dair fikir mübadiləsi aparmışlar. Xüsusilə, ötən ilin noyabrında keçirilən seçkilər nəticəsində Konqresdə yaranan siyasi qüvvələr tarazlığı, respublikaçı spikerin başçılığı altında Nümayəndələr Palatasının yeni tərkibi və Senatla işin qurulması məsələləri diqqət mərkəzində olmuşdur.
Azərbaycanın ABŞ-dakı səfiri Yaşar Əliyev toplaşanlara 2010-cu ildə Azərbaycan Respublikasının xarici siyasətdə əldə etdiyi uğurlardan danışmışdır. O qeyd etmişdir ki, ötən ilin sentyabrında Nyu-Yorkda Prezident İlham Əliyev və Prezident Barak Obama arasında baş tutan görüşdə dövlət başçıları qarşılıqlı maraq doğuran müxtəlif məsələlər üzrə açıq dialoq qurmuşlar. Bundan başqa, ötən il dövlət katibi Hillari Klinton, müdafiə naziri Robert Geyts və digər yüksək vəzifəli ABŞ rəsmilərindən ibarət nümayəndə heyətlərinin Azərbaycana səfərləri ölkələrimiz arasında münasibətlərin davamlı və qarşılıqlı hörmət ruhunda inkişafını nümayiş etdirmişdir. Səfir demişdir ki, Azərbaycan-ABŞ münasibətlərinin möhkəmləndirilməsində Amerikada yaşayan azərbaycanlıların da mühüm rolu vardır. Müzakirələrə toplaşan diaspor fəallarının Kaliforniya, Texas, Nyu-York, Florida, Virciniya və digər ştatlardan olduğunu diqqətə çatdıran diplomat bu çoğrafiyanın ABŞ azərbaycanlılarının ölkədə geniş səpələndiyindən xəbər verdiyini demişdir. Yaşar Əliyev Azərbaycanın maraqlarını müdafiədə, xüsusilə də Ermənistan-Azərbaycan, Dağlıq Qarabağ münaqişəsi barədə həqiqətlərin yayılmasında həmvətənlərimizi daha sıx, əlaqəli və fəal olmağa çağırmışdır.

Şəfəq AKİFQIZI AzərTAc-ın xüsusi müxbiri
Vaşinqton