{nl}

Yanvarın 10-da Azərbaycanın xarici işlər naziri Elmar Məmmədyarov Küveytə işgüzar səfəri çərçivəsində bu ölkənin vəliəhdi Şeyx Nəvaf Əl-Əhməd Əl-Cabir Əl-Sabah ilə görüşmüşdür.
Xarici İşlər Nazirliyinin mətbuat xidmətindən bildirmişlər ki, görüşdə Azərbaycan ilə Küveyt arasında ikitərəfli münasibətlərə dair müzakirələr aparılmışdır.
Vəliəhd Azərbaycan ilə Küveyt arasında münasibətlərin yüksək səviyyədə olduğunu vurğulayaraq, ölkəmizdə enerji sahəsində inkişaf prosesi, xüsusilə də təbii qaz hasilatı və ixracı sahəsində aparılan işlərlə maraqlanmışdır.
Nazir E.Məmmədyarov Küveyt Dövlətinin vəliəhdinə Azərbaycanda enerji sahəsində aparılan işlər, bu sahədə müxtəlif dövlətlərlə əməkdaşlıq, həmçinin Avropanın enerji təhlükəsizliyinə ölkəmizin verdiyi töhfə barədə məlumat vermişdir.
Görüşdə ikitərəfli, regional münasibətlər və digər qarşılıqlı maraq doğuran məsələlər ətrafında fikir mübadiləsi aparılmışdır.

AzərTAc