Türkiyə Strateji Araşdırmalar Mərkəzinin (TÜRKSAM) təşkilatçılığı ilə yanvarın 8-də İğdır şəhərinin Mədəniyyət Mərkəzində "Qlobal və regional siyasətdə qonşularımız və İğdır" mövzusunda konfrans keçirilmişdir.
Konfransda TÜRKSAM və Türkiyə-Azərbaycan dərnəyinin sədri Sinan Oğanın məruzəsi dinlənilmişdir. İğdırın strateji əhəmiyyətini qeyd edən S.Oğan, şəhərin Türkiyənin Azərbaycana və Orta Asiyaya açılan qapısı olduğunu vurğulamışdır.
Məruzədə, həmçinin, Türkiyənin daxili və xarici siyasəti, region ölkələri ilə münasibətləri, Ermənistanın işğalı altındakı Azərbaycan torpaqlarının azad edilməsinin zəruriliyi bildirilmiş, ermənilər tərəfindən törədilmiş cinayətkar əməllərin unudulmadığı diqqətə çatdırılmışdır.
Konfransda İğdırın strateji əhəmiyyəti və digər məsələlər ilə bağlı müzakirələr aparılmış, çıxışlar olmuşdur.

AzərTAc