Ölkənin ərazi bütövlüyünün bərpa edilməsi 2011-ci ildə Azərbaycanın xarici siyasətinin öncül istiqamətlərindən biridir.
Azərbaycan Xarici İşlər Nazirliyinin 2010-cu ilin yekun press-relizində bildirilmişdir.
Azərbaycanın 2011-ci ildə xarici siyasətinin öncül istiqamətlərindən biri Ermənistan-Azərbaycan, Dağlıq Qarabağ münaqişəsinin ölkəmizin ərazi bütövlüyü çərçivəsində həllidir.
Əsas istiqamətlər sırasında Xəzəryanı regionda mehriban qonşuluq münasibətlərinin və yüksək etimadın qorunub saxlanması, əməkdaşlığın və tərəfdaşlığın dərinləşdirilməsi, karbohidrogen ixracçısı kimi ən sabit və etibarlı ölkə olan Azərbaycanın mövqeyinin möhkəmləndirilməsi, sivilizasiyalararası dialoqa töhfə məqsədi ilə müxtəlif mədəniyyətlərin qovşağı olan Azərbaycanın geosiyasi xüsusiyyətlərindən istifadə olunması da vardır.