İlyas Əfəndiyev Fondunun ABŞ-ın "Boeing" şirkətinin dəstəyi ilə həyata keçirdiyi "Kimsəsiz və valideyn himayəsindən məhrum olmuş uşaq və yeniyetmələr üçün sosial-hüquqi reabilitasiya mərkəzi" layihəsi çərçivəsində Lökbatan qəsəbəsindəki kardiorevmatoloji uşaq sanatoriyasında kimsəsiz və valideyn himayəsindən məhrum olmuş uşaqlar üçün Yeni il şənliyi təşkil edilmişdir.
İlyas Əfəndiyev Fondunun mətbuat xidmətindən AzərTAc-a bildirmişlər ki, tədbir zamanı uşaqlara bayram sovqatı verilmiş, ziyafət və konsert proqramı təşkil olunmuşdur.
Bayram şənliyinə Azərbaycan Dövlət Mədəniyyət və İncəsənət Universitetinin müəllim və tələbə kollektivi, Tədris Teatrının əməkdaşları, gənc ulduzlar və İlyas Əfəndiyev Fondunun könüllüləri dəstək vermişlər.
Tədbirdə qonaq qismində Hemofiliyalı Xəstələrin Respublika Assosiasiyasının nümayəndələri də iştirak etmişlər.
AzərTAc{nl}