Azərbaycanın İKT sektorunun inkişafı ilə əlaqədar ölkə iqtisadiyyatında bəzi dəyişikliklər baş verəcək. Rabitə və İnformasiya Tenologiyaları Nazirliyinin mətbuat xidmətinin məlumatına görə, nazir Əli Abbasovun fikrincə, əsas istiqamətlərdən biri ölkədə internet- iqtisadiyyatın qurulması olacaq. Bu, ölkədəki bütün xidmətlərin, o cümlədən bank xidmətləri və ticarətin internet vasitəsilə həyata keçirilməsini nəzərdə tutur.
"Bu, çox perspektivli istiqamətdir. Britaniyanın internetdən gəlirləri təkcə ötən il 220 milyard dollar təşki edib"-deyə nazir bildirib.
İkinci istiqamət İKT sektorunda istehsalın - həm texniki qurğuların, həm də proqram təminatının artırılması və onun xaricə ixrac edilməsidir.
Bundan başqa, Azərbaycan müxtəlif layihələr və xidmətlər vasitəsilə regionda İKT infrastrukturunun mərkəzinə çevrilmək niyyətindədir - bura Şərq-Qərb informasiya dəhlizi, kosmik xidmətlər və s. daxildir. Nazirin sözlərinə görə, Azərbaycan ilk süni peykin xidmətlərinin yalnız 15-20%-dən istifadə edəcək, xidmətlərin qalan istifadəçiləri başqa ölkələr olacaq: "Artıq bunun üçün müraciət edənlər də var".

M.MÜKƏRRƏMOĞLU, "Xalq qəzeti"