Dekabrın 21-də Türk Asiya Strateji Araşdırmalar Mərkəzinin (TASAM) rəhbəri Süleyman Şənsoy Azərbaycan Respublikasının Prezidenti yanında Strateji Araşdırmalar Mərkəzində (SAM) olmuşdur.
SAM-ın direktoru Elxan Nuriyev qonağa mərkəzin fəaliyyəti, o cümlədən nəşr edilmiş elmi dərgilər, yerli və beynəlxalq əhəmiyyətli tədbirlər və perspektivli layihələr haqqında məlumat vermişdir.
SAM-dan bildirmişlər ki, söhbət zamanı Azərbaycan ilə Türkiyə arasında dostluq və qardaşlıq münasibətlərinin müxtəlif sahələrdə inkişafından məmnunluq bildirilərək, əməkdaşlığın bundan sonra da genişlənəcəyinə əminlik ifadə olunmuşdur. Yüksək səviyyədə qarşılıqlı səfərlər mübadiləsinin və siyasi dialoqun davam etdirilməsinin vacibliyini vurğulayan tərəflər, həmçinin humanitar sahədə əməkdaşlığın inkişaf etdirilməsini əhəmiyyətli saymışlar. Elm, təhsil, xüsusilə iki ölkənin "beyin mərkəzləri"nin elmi-tədqiqat sahəsində müxtəlif birgə layihələr həyata keçirmələrinin iki qardaş ölkə arasında təmasların daha intensiv xarakter daşıyacağına müsbət təsirindən danışılmışdır.
Görüşdə, həmçinin regional və beynəlxalq məsələlər, qarşılıqlı maraq kəsb edən bir sıra müxtəlif mövzular ətrafında da fikir mübadiləsi aparılmışdır.
AzərTAc