Dekabrın 17-də Dövlət Sərhəd Xidmətinin Türkan qəsəbəsində Xidməti Heyvanlar Mərkəzinin açılışı olmuşdur. Tədbirdə Dövlət Sərhəd Xidmətinin rəisi, Sərhəd Qoşunları Komandanı general-leytenant Elçin Quliyev iştirak etmişdir.
Dövlət sərhədlərimizin mühafizəsi işində xidməti heyvanlar mühüm rol oynayırlar. Sərhədçilər Vətənimizin hüdudlarının qorunmasında, partlayıcı maddələrin və narkotik vasitələrin tapılmasında, xüsusi təyinatlı tapşırıqların həll olunmasında xidməti itlərdən istifadə edirlər. Mərkəz dövlət sərhədinin mühafizəsində bu sahədəki qabaqcıl təcrübənin öyrənilməsi və tətbiq edilməsində, dövlət sərhədini pozan şəxslərin axtarılması və tutulmasında, terror və təxribat vasitələrinin aşkar edilməsində, obyektlərin mühafizəsi və digər tapşırıqların yerinə yetirilməsində mühüm rol oynayacaqdır.
Yeni istifadəyə verilən mərkəz bütün tələblərə cavab verir. Burada yataqxana, yeməkxana, hamam, hər cür şəraiti olan qərargah binası, aptek, laboratoriya, fotolaboratoriya, rentgen və həkim otaqları, fizioterapiya, cərrahiyyə də daxil olmaqla xidməti heyvanların müayinəsi və müalicəsi üçün 17 otaqlı baytarlıq məntəqəsi, verilən qidaların hazırlanması üçün mətbəx, itlərin saxlanması üçün yerlər, qazanxana, təlim şəhərciyi və digər xüsusi tikililər vardır.
Tədbir iştirakçıları yeni obyektlə tanışlıqdan sonra təlim şəhərciyində praktik təlimlərə baxmışlar.{nl}