Dekabrın 16-da Qazaxıstanın Azərbaycandakı səfirliyi ölkəsinin milli bayramı - Müstəqillik gününün 19-cu ildönümü münasibətilə Bakı Biznes Mərkəzində rəsmi qəbul təşkil etmişdir.
Səfir Serik Primbetov ötən müddətdə ölkəsinin keçdiyi inkişaf yolundan danışaraq bildirmişdir ki, hazırda Qazaxıstan dünya birliyində layiqli yer tutur.
Diplomat vurğulamışdır ki, əsası Azərbaycan xalqının ümummilli lideri Heydər Əliyev və Qazaxıstan Prezidenti Nursultan Nazarbayev tərəfindən qoyulmuş dostluq və qardaşlıq münasibətləri bu gün Prezident İlham Əliyev tərəfindən uğurla davam etdirilir. Azərbaycan və Qazaxıstanı çoxəsrlik mehriban qonşuluq və qarşılıqlı dəstək ənənələri birləşdirir. Əminəm ki, qarşılıqlı səylərimiz bundan sonra da bu nəcib ənənələrin inkişaf etdirilməsinə, xalqlarımızın və ölkələrimizin tərəqqisi, regionda sülh, təhlükəsizlik və sabitlik naminə dövlətlərarası münasibətlərin daha da inkişaf etdirilməsinə yönəldiləcəkdir.
Kənd təsərrüfatı naziri İsmət Abasov Azərbaycan Prezidenti İlham Əliyevin təbrikini, Qazaxıstan xalqına əmin-amanlıq və firavanlıq arzularını çatdırmışdır.
Nazir bildirmişdir ki, ölkələrimiz arasında həmişə səmimi münasibətlər olmuşdur və bu münasibətlər müstəqillik bərpa olunandan sonra intensiv inkişaf etməyə başlamışdır. İki ölkə arasında həyata keçirilən yüksək səviyyəli səfərlər və imzalanmış çoxsaylı sənədlər ikitərəfli əlaqələrimizin daha sürətlə inkişafına töhfəsini vermişdir. Nazir Azərbaycan-Qazaxıstan əlaqələrinin gələcəkdə daha da inkişaf edəcəyinə əminliyini ifadə etmişdir.
Tədbirdə Qazaxıstanın milli musiqilərindən ibarət konsert proqramı təqdim olunmuşdur.
Qəbulda Azərbaycanın dövlət və hökumət rəsmiləri, xarici ölkələrin Bakıdakı səfirləri, ictimaiyyətin nümayəndələri iştirak etmişlər.{nl}