Misirin Luksor şəhərində keçirilən insan alverinə qarşı mübarizə üzrə Beynəlxalq forumda iştirak edən Azərbaycan Milli Məclisinin deputatı Qənirə Paşayeva və Rabitə və İnformasiya Texnologiyaları Nazirliyi nəzdindəki Yüksək Texnologiyaların Tədqiqi Mərkəzinin direktoru, professor Sevda Abdullayeva tədbir çərçivəsində Bəhreyn Krallığının birinci xanımı, şahzadə Sabeeka bint İbrahim əl-Xəlifə ilə görüşmüşlər.
AzərTAc-ın müxbiri Qahirədən xəbər verir ki, görüşdə Bəhreynin birinci xanımı və eyni zamanda, ölkəsində Qadın Məsələləri üzrə Ali Şuranın prezidenti olan Sabeeka bint İbrahim əl-Xəlifəyə Azərbaycan haqqında ətraflı məlumat verilmiş, ölkələrimiz arasında əməkdaşlığın perspektivləri ilə bağlı fikir mübadiləsi aparılmışdır.
Qənirə Paşayeva, eyni zamanda, Bəhreyn Krallığının birinci xanımına Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyevanın müxtəlif sahələr, o cümlədən mədəniyyətlər və sivilizasiyalararası dialoq sahəsində gördüyü işlər barədə də geniş məlumat vermişdir.
AzərTAc{nl}