Azərbaycan Milli Məclisinin deputatı Qənirə Paşayeva və Rabitə və İnformasiya Texnologiyaları Nazirliyi nəzdindəki Yüksək Texnologiyaların Tədqiqi Mərkəzinin direktoru, professor Sevda Abdullayeva Misir Ərəb Respublikasının Luksor şəhərində keçirilən insan alverinə qarşı mübarizə üzrə Beynəlxalq forum çərçivəsində Misirin birinci xanımı Suzan Mübarəklə görüşmüşlər.
AzərTAc-ın müxbiri Qahirədən xəbər verir ki, görüş zamanı Misirin birinci xanımı təmsil etdiyi ölkənin Azərbaycan ilə əməkdaşlığının inkişaf səviyyəsindən məmnun olduğunu vurğulamışdır.
Milli Məclisin üzvü Qənirə Paşayeva isə Azərbaycanın siyasi rəhbərliyinin Misir dövləti ilə əlaqələrin inkişafına daim böyük əhəmiyyət verdiyini demişdir. Suzan Mübarəkin rəhbərliyi altında "İnsan alverinə son" devizi altında keçirilən Beynəlxalq forumun çox vacib və əhəmiyyətli olduğunu vurğulayan Qənirə Paşayeva, Azərbaycanın da bu məsələyə böyük diqqət yetirdiyini və insan alverinin qarşısının alınması istiqamətində mühüm işlər gördüyünü Suzan Mübarəkin diqqətinə çatdırmışdır.{nl}