Şimali Kiprdəki Lefke Avropa Universitetində Avrasiya İqtisadi Əlaqələr Dərnəyinin təşkilatçılığı ilə keçirilmiş "XXI əsrdə türk dünyası" simpoziumunun Bəyannaməsində Azərbaycan torpaqlarının Ermənistan tərəfindən işğalı pislənilmişdir.
Türkiyə, Azərbaycan, Türkmənistan, Özbəkistan, Qazaxıstan və Qırğızıstandan deputatların və alimlərin iştirak etdiyi simpoziumun yekun Bəyannaməsində bildirilir ki, Azərbaycan ərazilərinin işğalı nəticəsində yurd-yuvasından didərgin düşmüş, əzilmiş və sarsıntılar keçirmiş Azərbaycan türklərinin problemlərinin tezliklə həlli üçün türk dünyası ölkələrinin hər bir platformada birlik və həmrəylik nümayiş etdirməsi zəruridir.
Xocalı soyqırımının dünyaya çatdırılması prosesində bütün türk dövlətlərinin rəsmi qurumlarının birgə fəaliyyətinin əhəmiyyəti vurğulanmışdır.
Simpozium iştirakçıları Azərbaycanın işğal olunmuş torpaqlarının azad edilməsi və Dağlıq Qarabağ probleminin BMT Təhlükəsizlik Şurasının qətnamələrinə uyğun şəkildə nizama salınması məsələsində israrlıdırlar.

Oqtay BAYRAMOV AzərTAc-ın xüsusi müxbiri
Ankara