Azərbaycanın Xarici İşlər Nazirliyinin mətbuat xidmətindən AzərTAc-a bildirmişlər ki, dekabrın 7-də nazir Elmar Məmmədyarov ölkəmizdə səfərdə olan İtaliyanın xarici işlər nazirinin müavini, senator Alfredo Mantikanın başçılıq etdiyi nümayəndə heyəti ilə görüşmüşdür.
Azərbaycan ilə İtaliya arasında münasibətlərin yüksək səviyyədə olduğunu deyən E.Məmmədyarov bunun həm ikitərəfli məsələlərdə, həm də beynəlxalq təşkilatlar çərçivəsində mövcud əməkdaşlıqda öz əyani təzahürünü tapdığını bildirmişdir. Azərbaycanın xarici işlər naziri ölkələrimiz arasında əməkdaşlığın genişləndirilməsi üçün böyük potensialın mövcud olduğunu demişdir.
A.Mantika İtaliyanın Azərbaycan ilə yalnız neft sektorunda deyil, qeyri-neft sektorunda da əməkdaşlığın genişləndirilməsində maraqlı olduğunu vurğulamışdır.
Görüşdə hər iki ölkənin parlamentləri arasında münasibətlərin intensivləşdirilməsinin vacibliyi qeyd olunmuşdur. Avropa İttifaqı çərçivəsində əməkdaşlığın səviyyəsini yüksək qiymətləndirən tərəflər xüsusda "Şərq tərəfdaşlığı" proqramının əhəmiyyətini vurğulamışlar.
Sonda Azərbaycanın xarici işlər nazirinin müavini Xələf Xələfov və onun italiyalı həmkarı A.Mantika "Azərbaycan Respublikası hökuməti və İtaliya Respublikasının hökuməti arasında diplomatik və xidməti pasportlara malik şəxslər üçün vizaların ləğv edilməsi haqqında Saziş" imzalamışlar.{nl}