Əfqanıstana qeyri-hərbi sahədə yardımlar göstərilməsi ilə əlaqədar tədbirlər çərçivəsində Azərbaycan Respublikası Milli Təhlükəsizlik Nazirliyinin Heydər Əliyev adına Akademiyasında 2010-cu ilin noyabr ayında Əfqanıstanın bir qrup yüksək rütbəli təhlükəsizlik zabiti üçün "Müasir dövrdə terror təhdidləri və onlara qarşı mübarizə" mövzusunda ikihəftəlik tədris kursları təşkil edilmişdir.
Milli Təhlükəsizlik Nazirliyinin ictimai əlaqələr mərkəzindən bildirmişlər ki, təlim prosesində akademiyanın professor-müəllim heyəti və milli təhlükəsizlik orqanlarının təcrübəli əməkdaşları tərəfindən mühazirələr oxunmuş və praktiki məşğələlər keçirilmişdir.
Kurs müddətində Əfqanıstanın təhlükəsizlik zabitlərinə Azərbaycan xalqının tarixi və mədəniyyəti, dövlət quruculuğunun inkişaf yolları və müasir mərhələsi barədə ətraflı məlumat verilmişdir. Onlar üçün habelə AMEA-nın Milli Azərbaycan Tarixi Muzeyinə, "Şirvanşahlar Sarayı Kompleksi" Dövlət tarixi memarlıq qoruq-muzeyinə, Bibiheybət məscidinə, Bakı şəhərinin digər görməli yerlərinə, Şamaxı və Lənkəran şəhərlərinə ekskursiya və səfərlər təşkil olunmuşdur.
Noyabr ayının 30-da tədrisin başa çatması ilə əlaqədar kurs iştirakçıları ilə görüş keçirilmişdir.
Akademiyanın rəisi, general-leytenant Ziya Yusif-zadə Əfqanıstanın dövlət quruculuğu üçün vacib olan tarixi mərhələdə əfqan xalqına yardım göstərilməsinin xüsusi əhəmiyyətini qeyd etmişdir.
Sonda Əfqanıstanın təhlükəsizlik zabitlərinə təlim-tədris kurslarını müvəffəqiyyətlə bitirmələri barədə müvafiq sertifikatlar təqdim olunmuşdur.{nl}