Qurban bayramı ölkəmizin hər yerində olduğu kimi, Nəsimi rayonunda da böyük təntənə ilə qeyd edilmişdir.
Tədbiri rayon icra hakimiyyətinin başçısı Nəsib Məhəməliyev açaraq hamını bu müqəddəs bayram münasibətilə təbrik etmişdir. O bildirmişdir ki, xalqımız həmişə öz milli-mənəvi dəyərlərinə böyük ehtiramla yanaşır. Ölkəmizdə Qurban bayramı böyük təntənə və ruh yüksəkliyi ilə qeyd edilir. Bu bayram bərəkət, mərhəmət və xeyirxah əməllərin rəmzi, insanları bir-birinə yaxınlaşdıran, onlara ən yüksək keyfiyyətlər bəxş edən hadisədir.
Həmin gün rayon icra hakimiyyəti tərəfindən 1200-dən çox ailəyə qurban payları verilmişdir. Eyni zamanda, yataq xəstəsi olan sakinlərə də baş çəkilmiş, onların bayramları təbrik edilmiş və qurban payları verilmişdir. Qeyd edək ki, rayonda qayğıya ehtiyacı olan insanların problemlərinin həlli yönündə işlər mütəmadi olaraq həyata keçirilir.

Ayaz HƏMİDOĞLU, "Xalq qəzeti"