Ombudsman aparatında BMT nümayəndəsinin iştirakı ilə universal dövri icmal (UDİ) üzrə tövsiyələrin icrası müzakirə edilmişdir.
Ombudsman aparatından bildirmişlər ki, müvəkkil Elmira Süleymanova insan hüquqları üzrə tətbiq olunan yeni mexanizmlər sırasında UDİ-nin daha çox önəm kəsb etdiyini, bu prosesdə QHT-lərin də alternativ hesabatlar təqdim etdiklərini diqqətə çatdırmışdır. O, bu prosesin hazırlıq, iştirak və verilmiş tövsiyələrin öyrənilərək həyata keçirilməsi kimi üç mərhələdən ibarət olduğunu qeyd etmişdir. Müvəkkil icmal prosesinin bir neçə il əvvəl başlandığını, hazırda həmin prosesin qiymətləndirilməsinin ilk mərhələsinin davam etdiyini vurğulamışdır.
BMT-nin İnsan Hüquqları üzrə Ali Komissarlığının Avropa, Mərkəzi Asiya və Amerika bölməsinin rəhbəri Cianni Maqazzeni UDİ anlayışının mahiyyəti, insan hüquqları sahəsində bu mexanizmin həyata keçirilməsinin məqsəd və vəzifələri barədə iştirakçılara ətraflı məlumat vermişdir. Milli insan hüquqları təsisatları, o cümlədən səmərəli, peşəkar fəaliyyət göstərən Azərbaycan Ombudsman təsisatı ilə əməkdaşlığa önəm verdiyini diqqətə çatdırmışdır. O dövlət qurumları ilə yanaşı, QHT-lər və vətəndaş cəmiyyəti ilə sıx əməkdaşlığın əhəmiyyətini vurğulamışdır.
Çıxış edən QHT nümayəndələri insan hüquqları sahəsində maarifləndirmə işinin genişləndirilməsinin, vətəndaş cəmiyyəti ilə dövlət qurumları arasında dialoqun, qarşılıqlı əməkdaşlığın zəruriliyini vurğulamışlar.
AzərTAc{nl}