Martın 15-də Xaçmaz Rayon İcra Hakimiyyəti, Azərbaycan Respublikasının Auditorlar Palatası və G&R Biznes Xidmətləri MMC (GRBS) Tədris Mərkəzinin birgə təşkilatçılığı ilə Xaçmaz şəhərində “Şəffaflıq və müəssisələrin fəaliyyətində beynəlxalq standartların tətbiqi” mövzusunda zona seminar-müşavirəsi keçirilmişdir.

Tədbirdə icra hakimiyyəti strukturlarının, müvafiq iqtisadi qurumların nümayəndələri, regionlardakı təsərrüfat subyektlərinin rəhbərləri və mütəxəssisləri iştirak etmişlər.

Seminar-müşavirə iştirakçıları əvvəlcə ümummilli lider Heydər Əliyevin abidəsini ziyarət etmişlər.

Ümumi iclasda rayon icra hakimiyyətinin başçısı Şəmsəddin Xanbabayev tədbirin əhəmiyyətindən danışmış, “Regionların sosial-iqtisadi inkişafı proqramının uğurları” mövzusunda məruzə etmişdir.

Azərbaycan Respublikası Auditorlar Palatasının sədri, iqtisad elmləri doktoru, professor Vahid Novruzovun “Sosial-iqtisadi inkişafın Azərbaycan modelində şəffaflıq amili”, GRBS Tədris Mərkəzinin direktoru Bəhram Qurbanovun “Beynəlxalq Mühasibat Uçotu Standartlarının Azərbaycanda tətbiqi və Milli Mühasibat Uçotu Standartlarının yaradılması ilə əlaqədar təhsil və ixtisasartırma proqramlarının aktuallığı” mövzularında məruzələri dinlənilmişdir.

Məruzələrdən sonra praktiki seminar keçirilmişdir. Auditorlar Palatası sədrinin elmi-metodik məsələlər üzrə müşaviri Nəcəf Talıbov “Maliyyə hesabatlarının şəffaflığının təmin edilməsində beynəlxalq standartların rolu”, GRBS Tədris Mərkəzinin ekspert-məsləhətçisi Elşən Rəhimov “Beynəlxalq və milli mühasibat uçotu standartları” mövzularında məruzə etmişlər.

Seminar iştirakçılarının suallarına cavab verilmiş, onlara sertifikatlar təqdim edilmişdir.

AzərTAc