Noyabrın 4-də Mərkəzi Seçki Komissiyasının sədri Məzahir Pənahov ATƏT Parlament Assambleyasının vitse-prezidenti Volfqanq Qrossrukun rəhbərlik etdiyi müşahidə missiyasının üzvləri ilə görüşmüşdür.
Mərkəzi Seçki Komissiyasının mətbuat xidmətindən bildirmişlər ki, görüşdə Milli Məclisə keçirilən seçkilərlə bağlı seçkiqabağı durum barədə müzakirələr aparılmışdır.
MSK sədri qeydə alınmış namizədlərin seçkiqabağı təşviqat aparmaları üçün hərtərəfli şəraitin yaradıldığını, seçki komissiyalarının fəaliyyətində aşkarlığın təmin edilməsi üçün bütün qanuni addımların atıldığını, seçki məntəqələrinin səsverməyə tam hazır vəziyyətə gətirildiyini missiya üzvlərinin diqqətinə çatdırmışdır.
Müşahidə missiyasının rəhbəri ətraflı məlumata görə Mərkəzi Seçki Komissiyasının sədrinə təşəkkürünü bildirmiş və qarşıdan gələn parlament seçkilərində uğurlar arzulamışdır.
AzərTAc