Avropa Şurası Parlament Assambleyası (AŞPA) noyabrın 7-də keçiriləcək parlament seçkilərini izləmək üçün 30 nəfərdən ibarət qısamüddətli müşahidə missiyasını Azərbaycana göndərəcəkdir.
AzərTAc AŞPA-nın internet saytındakı məlumata istinadla xəbər verir ki, belçikalı deputat Pol Villin rəhbərlik edəcəyi missiya noyabrın 5-dən 8-dək Azərbaycanda olacaqdır. AŞPA nümayəndə heyəti seçkilərin gedişini ATƏT-in Demokratik Təsisatlar və İnsan Haqları Bürosunun müşahidəçiləri ilə birlikdə izləyəcəkdir.
Avropalı parlamentarilər 7 noyabr seçkilərindən öncə ölkənin rəsmi şəxsləri, siyasi partiya mənsubları, Mərkəzi Seçki Komissiyasının (MSK) sədri, yerli müşahidəçilər, eləcə də vətəndaş cəmiyyətinin və mətbuatın nümayəndələri ilə görüşlər keçirəcəklər.
Oktyabrın 18-dən 21-dək Bakıda səfərdə olmuş AŞPA seçkiqabağı müşahidə missiyası heyəti seçkilərə hazırlıq dövründə yaradılmış şəraiti, MSK-nın bu istiqamətdə gördüyü işləri, o cümlədən seçicilərin maariflənməsi ilə bağlı MSK-nın proqramını yüksək qiymətləndirmişdir.
AŞPA-nın qısamüddətli müşahidə missiyası noyabrın 8-də Bakıda mətbuat konfransı keçirəcəkdir.{nl}