"Parlament-2010" Seçki Monitorinqi Koalisiyası "Elektron Hökumət" sisteminin "Elektron səsvermə və ictimai rəyin öyrənilməsi" komponenti vasitəsilə 2010-cu il noyabrın 7-də Azərbaycan Respublikasının Milli Məclisinə seçkilərdə elektron səsvermənin təşkilini həyata keçirəcəkdir.
Bu komponent Azərbaycan Respublikası Rabitə və İnformasiya Texnologiyaları Nazirliyinin Məlumat-Hesablama Mərkəzi tərəfindən elan olunmuş müsabiqə nəticəsində Koalisiyanın istifadəsinə verilmişdir.
Seçki Monitorinqi Koalisiyasından bildirmişlər ki, "Elektron səsvermə və ictimai rəyin öyrənilməsi" komponenti vətəndaşın qeydiyyatda olduğu ərazi üzrə Milli Məclisə seçkilərdə qeydiyyata alınmış namizədlərə elektron səs verməsinə imkan yaradır.
Elektron səsvermə 2010-cu il noyabrın 7-də saat 8:00-dan 19:00-dək www.e-secim2010.az  internet ünvanındakı saytda aparılacaqdır. Nəticələr səsvermə prosesi başa çatdıqdan sonra elan olunacaqdır.
Layihə və səsvermə haqqında ətraflı məlumatı saytdan əldə etmək olar.
AzərTAc{nl}