Standartlaşdırma, Metrologiya və Patent üzrə Dövlət Komitəsinin (SMPDK) mətbuat xidmətindən bildirmişlər ki, sənaye mülkiyyətinin mühafizəsi üzrə Paris Konvensiyasına uyğun olaraq, Azərbaycan Respublikasının dövlət rəmzləri - bayraq və gerb müvafiq qaydada mühafizə olunması məqsədi ilə Dünya Əqli Mülkiyyət Təşkilatının (DƏMT) beynəlxalq bürosu tərəfindən qeydiyyata alınmışdır.
SMPDK-nin DƏMT-ə rəsmi müraciəti əsasında qurumun beynəlxalq bürosu tərəfindən qeydiyyata alınmış dövlət rəmzləri haqqında rəsmi bülletendə məlumat çap edilmişdir. Həmçinin DƏMT-nin rəsmi saytında qeydiyyata alınmış dövlət rəmzlərinin təsvirləri yerləşdirilmişdir (www.wipo.int/ipdl/en/6ter ).
Qeyd edək ki, Paris Konvensiyasının 6ter maddəsinə əsasən, dövlət bayraqları, gerbləri, emblemləri, rəsmi möhürləri və damğalarının əmtəə nişanı kimi və ya nişanlarda xüsusi element kimi qeydiyyatı və istifadəsinə yol verilmir.
Azərbaycan sənaye mülkiyyətinin mühafizəsi üzrə Paris Konvensiyasına 1995-ci il dekabrın 25-də qoşulmuşdur.
AzərTAc