Naxçıvanda Heydər Əliyev Uşaq-Gənclər Yaradıcılıq Mərkəzində sağlamlıq imkanları məhdud olan ifaçıların konserti olmuşdur.
Naxçıvan MR Ali Məclisinin sədri Vasif Talıbov konsert proqramına baxmışdır.
Konsertin aparıcısı qeyd etmişdir ki, muxtar respublikada bütün sahələrin inkişafının təmin edilməsi ilə yanaşı, əhalinin aztəminatlı hissəsinin, o cümlədən sağlamlıq imkanları məhdud insanların, şəhid ailələrinin, ahılların sosial müdafiəsinin gücləndirilməsinə də ciddi diqqət yetirilir. Regionda sağlamlıq imkanları məhdud vətəndaşlarımızın sosial müdafiəsi və sağlamlıqlarının bərpası məqsədi ilə ardıcıl tədbirlər görülür. Onların fərdi evləri, nəqliyyat vasitələri ilə təmin edilməsi, sosial xidmətlərin göstərilməsi, müalicə və istirahətlərinin təşkili həyata keçirilən tədbirlərin yalnız bir ifadəsidir. Bütün bunlarla bərabər, belə insanların asudə vaxtlarının səmərəli keçirilməsi, xüsusi istedada malik olanların aşkara çıxarılması məqsədi ilə müxtəlif idman yarışları, əl işlərindən və rəsm əsərlərindən ibarət sərgilər, bədii yaradıcılıq baxış-müsabiqələri təşkil edilir. Sağlamlıq imkanları məhdud ifaçıların konserti bu istiqamətdə görülən işlərin məntiqi davamıdır.
Ali Məclisin sədri sonda uğurlu konsert proqramına görə ifaçılara təşəkkürünü bildirmiş, onlara yeni-yeni uğurlar arzulamışdır.
AzərTAc{nl}