Azərbaycan Respublikasının Sankt-Peterburq şəhərindəki baş konsulluğunun mətbuat xidmətindən bildirmişlər ki, oktyabrın 29-da Tavriçeski sarayında "Həyat təhlükəsizliyi naminə yollarda təhlükəsizlik" mövzusunda üçüncü beynəlxalq konqres keçirilmişdir. Tədbirdə 16 ölkədən beynəlxalq təşkilatların, qanunverici və icraedici orqanların, MDB ölkələri dövlət yol polisinin nümayəndələri iştirak etmişlər.
Konqresi Rusiya Federasiya Şurasının sədri Sergey Mironov açaraq, müzakirə olunacaq mövzunun əhəmiyyətini iştirakçıların diqqətinə çatdırmışdır.
Mərasimdə Azərbaycanın daxili işlər nazirinin müavini, polis general-leytenantı Oruc Zalov məruzə ilə çıxış etmişdir.
Konqres çərçivəsində keçirilən "Yol hərəkəti təhlükəsizliyi" mövzusunda "dəyirmi masa"da Azərbaycan Daxili İşlər Nazirliyi Baş Dövlət Yol Polisi İdarəsinin rəisi Ramiz Zeynalov iştirak etmişdir.
Tədbirin yekununda qəbul edilmiş bəyannamədə yol hərəkəti təhlükəsizliyindəki problemlərin həlli və milli qanunvericiliyin təkmilləşdirilməsi sahəsində beynəlxalq parlamentlərarası əlaqələrin inkişafı üçün əsas istiqamətlər müəyyən edilmişdir.
AzərTAc{nl}