Mərkəzi Seçki Komissiyası (MSK) dairə seçki komissiyalarının katibliklərində çalışan informasiya texnologiyaları üzrə mütəxəssisləri üçün treninqlərə başlamışdır.
MSK-nın beynəlxalq əlaqələr şöbəsinin müdiri Rövzət Qasımov bildirmişdir ki, noyabrın 7-də keçiriləcək seçkilərə hazırlıqla bağlı son işlər gedir. Artıq bütün dairə və məntəqə seçki komissiyaları lazımi avadanlıq və digər ləvazimatla təmin olunmuşdur. Treninqlərin məqsədi dairə seçki komissiyalarının katibliklərində çalışan mütəxəssislərin peşəkarlığını artırmaq, səsvermə günü prosesin gedişi və nəticələr barədə məlumatların operativ şəkildə MSK nəzdində "Seçkilər" İnformasiya Mərkəzinə ötürülməsini təmin etməkdir.
R.Qasımov demişdir ki, bütün seçki dairələrində informasiya texnologiyaları üzrə mütəxəssislər vardır. Treninqlərə hər dairədən bir mütəxəssis cəlb olunmuşdur. Onlara seçki qanunvericiliyinin tələbləri, səsvermə günü hansı məqamlara daha çox diqqətin ayrılması və əməl olunması, proqram təminatı ilə necə davranmaq və digər məsələlər izah olunur.
Treninqləri MSK nəzdində "Seçkilər" İnformasiya Mərkəzinin yüksək ixtisaslı, peşəkar mütəxəssisləri keçirlər.
Treninqlər üç gün davam edəcəkdir.{nl}