Bakının möhtəşəm beynəlxalq tədbirlərə ev sahibliyi etməsi çox sevindirici haldır. Bu, Azərbaycanın beynəlxalq miqyasda nüfuzunun getdikcə daha da artdığını nümayiş etdirir.
Bu sözləri Bakıda keçirilmiş beynəlxalq münasibətlər üzrə alimlərin birinci illik simpoziumunda iştirak edən ATƏT-in Bakı ofisinin keçmiş rəhbəri, hollandiyalı ekspert Aleksandr Kornelisen müsahibəsində demişdir.
A.Kornelisen iki günlük simpoziumun dünyanın müxtəlif ölkələrindən gəlmiş alimlərin əhəmiyyətli mövzular ətrafında fikir mübadiləsi aparmaları baxımından əla imkan olduğunu söyləmişdir. Bu tədbirin keçirilməsini xüsusilə də gənc alimlər arasında əməkdaşlıq əlaqələrinin qurulması və inkişafı baxımından stimullaşdırıcı hadisə hesab etmək olar.
Qonaq Azərbaycandakı inkişaf prosesləri ilə bağlı demişdir: "Mən on il bundan əvvəl ATƏT-in Bakı ofisinin rəhbəri işləmişəm. On ildən sonra Azərbaycana qonaq gəlməkdən çox məmnunam. Bakıda özümü doğma vətənimdəki kimi hiss edirəm. Burada gördüyüm inkişaf prosesləri məni valeh etdi".
A.Kornelisen əmin olduğunu bildirmişdir ki, Azərbaycanda bu cür yüksək səviyyəli tədbirlər davamlı olaraq keçiriləcəkdir.{nl}