Oktyabrın 22-də Bakıdakı 5 nömrəli məktəbdə 24 oktyabr - Birləşmiş Millətlər Təşkilatı Gününə həsr olunmuş tədbir keçirilmişdir.
Təhsil Nazirliyinin, Bakı Şəhəri üzrə Təhsil İdarəsinin dəstəyi, BMT-nin İctimai İnformasiya Departamentinin təşkilatçılığı ilə "BMT sizin üçün çalışır" (UN4U) kampaniyası çərçivəsində keçirilən tədbirdə məktəbin yuxarı sinif şagirdləri iştirak etmişlər.
Tədbirdə BMT-nin Azərbaycan üzrə İctimai İnformasiya Departamentinin nümayəndəsi Araz Yusubov şagirdlərə təmsil etdiyi beynəlxalq təşkilatın yaranması, fəaliyyəti, strukturu haqqında ətraflı məlumat vermişdir. Bildirmişdir ki, 1945-ci il oktyabrın 24-də BMT-nin Nizamnaməsi qüvvəyə minmişdir və həmin tarix 1948-ci ildən bəri BMT Günü kimi qeyd edilir.
2008-ci ildən başlayan bu təbliğat kampaniyasının əsas məqsədi məktəbliləri, gəncləri və bütün ictimaiyyəti BMT-nin sistemi, təşkilatın ölkədə gördüyü işlər haqqında məlumatlandırmaqdır. Oktyabrın 19-dan 26-dək davam edəcək BMT həftəsi çərçivəsində Bakının, həmçinin Gəncə, Mingəçevir və Füzulinin 300-dən çox orta məktəbində maarifləndirici tədbirlərin keçirilməsi nəzərdə tutulmuşdur.
BMT-nin əlaqələndirmə məsələləri üzrə müşaviri İradə Əhmədova agentliklərin fəaliyyətinin əlaqələndirilməsi və Birləşmiş Millətlər Təşkilatının ayrı-ayrı sahələr üzrə gördüyü işlər barədə danışmışdır.
Tədbirdə mövzu ilə bağlı videoçarx nümayiş olunmuş, məktəbliləri maraqlandıran suallar cavablandırılmışdır.
AzərTAc

{nl}