Dövlət Müstəqilliyi Günündə Balakən şəhərində Qarabağ müharibəsi əlilləri və şəhid ailələri üçün inşa edilmiş dördmərtəbəli, 36 mənzilli yeni yaşayış binası istifadəyə verilib.
Bu münasibətlə keçirilən mərasimi giriş sözü ilə Balakən Rayon İcra Hakimiyyətinin başçısı Asif Məmmədov açaraq, şəhid ailələri və Qarabağ müharibəsi əlillərinin sosial rifah halının yüksəldilməsi, onların mənzil-məişət şəraitinin yaxşılaşdırılması məqsədilə həyata keçirilən tədbirlərin əhəmiyyətindən danışdı.
Əmək və əhalinin sosial müdafiəsi naziri Füzuli Ələkbərov çıxışında əhalinin imtiyazlı təbəqələrinə göstərilən dövlət qayğısından söhbət açdı. Nazir şəhid analarını, Qarabağ müharibəsi əlillərini yeni mənzillərə köçmələri münasibətilə təbrik edərək, ölkəmizdə bu qəbildən olan insanların həyat şəraitinin yaxşılaşdırılması, təqaüdlərinin artırılması istiqamətində həyata keçirilən tədbirlərin bundan sonra da davamlı olacağını bildirdi.
Tədbirin sonunda yeni mənzillərin sahiblərinə orderlər təqdim olundu.

İ.MUSAOĞLU, "Xalq qəzeti"nin bölgə müxbiri