Azərbaycan Respublikasının insan hüquqları üzrə müvəkkili Elmira Süleymanova ATƏT-in Demokratik Təsisatlar və İnsan Hüquqları Bürosunun (DTİHB) seçkiləri müşahidə missiyasının rəhbəri xanım Odri Qlover ilə görüşmüşdür.
Ombudsman Aparatından verilən məlumatda bildirilir ki, E.Süleymanova qarşıdan gələn Milli Məclisə seçkiləri nəzərə alaraq, seçki hüquqlarının prioritet məsələ olduğunu, Seçki Məcəlləsinə zəruri əlavə və dəyişikliklərin edildiyini, ölkə Prezidentinin bu sahədə müvafiq iki sərəncamının əhəmiyyətini və bu sənədlərin təbliğinin zəruriliyini vurğulamışdır. Mərkəzi Seçki Komissiyası tərəfindən təqvim planının təsdiq olunduğunu, Seçki Məcəlləsi və müvafiq təlimatlara uyğun iş aparıldığını bildirmişdir.
Müvəkkil insan hüquqları, o cümlədən vətəndaşların seçki hüququnun müdafiəsi və təmini sahəsində səmərəli fəaliyyət göstərdiyini, MSK ilə sıx əməkdaşlıq əlaqələri qurduğunu vurğulamışdır.
Xanım O.Qlover ombudsmanın bu sahədə fəaliyyətini müsbət qiymətləndirmiş, müvəkkilin təkliflərinin səmərəli olduğunu söyləmiş, bir sıra suallar ünvanlamışdır.
E.Süleymanova qonağı maraqlandıran sualları ətraflı cavablandırmış, səmərəli fikir mübadiləsi şəraitində keçən görüşdə əməkdaşlıq perspektivləri müzakirə olunmuşdur.{nl}