Dövlət Sərhəd Xidmətinin mətbuat mərkəzindən bildirmişlər ki, aprelin 13-də saat 19.00 radələrində Balakən rayonu ərazisində Gürcüstandan Azərbaycan Respublikası istiqamətində dövlət sərhədinin pozulmasının qarşısı alınmışdır.
Dövlət sərhədinin mühafizəsində olan sərhəd dəstəsi tərəfindən dövlət sərhədini qanunsuz keçən 3 nəfərdən ibarət qrup müəyyən edilmişdir.
Sərhəd pozucuları sərhəd dəstəsinin "dayan" əmrinə və havaya açılan xəbərdarlıq atəşinə məhəl qoymamış, sərhədçiləri soyuq silahla hədələyərək onların həyatları üçün real təhlükə yaratmışlar. Sərhəd dəstəsi mövcud qanunvericiliyin tələblərinə müvafiq olaraq silah tətbiq etmiş, nəticədə sərhəd pozucularından biri yaralanmışdır. Relyefin mürəkkəbliyindən istifadə edən sərhəd pozucuları Gürcüstan ərazisinə qaçmağa nail olmuşlar.
Faktla bağlı Azərbaycan Respublikası Cinayət Məcəlləsinin 318.2-ci maddəsinə əsasən cinayət işi başlanmışdır.
AzərTAc

{nl}